Konjufca: Sulmet ndaj policisë së Kosovës janë në interes të Putin

Kryetari i Kuvendit të Kosovës, Glauk Konjufca deklaroi se sulmet ndaj policisë në veri të vendit janë në interes të presidentit rus, Vladimir Putin që ta shpërndajë konfliktin me Ukrainën edhe në shtete të tjera.

Sipas tij, sulmet kanë për qëllim destabilizimin e Kosovës, teksa shtoi se Serbia është e varur nga Rusia.

“Është në interes të Putin që të shpërndajë konfliktin edhe nëpër vende të tjera. Sulmet mbi Policinë e Kosovës, unë i interpretoj mbi këtë motivacion që të shpërthejë lufta e destabilizimi edhe në pjesët tjera të Evropës”, theksoi Konjufca.

Kryeparlamentari u shpreh se sulme të tilla që vijnë nga Serbia janë të patolerueshme.

Këto deklarata, Konjuca i bëri ditën e sotme pas tubimit për nderimin e të rënëve në luftën e fundit në fshatin Dyz të Podujevës.

Mëngjesin e 15 prillit rreth orës 07:40, punonjës të policisë së Kosovës u sulmuan me granatë dore dhe kallash, në momentin kur ishin duke realizuar ndërrimin në pikat kufitare.

Ministri i Punëve të Brendshme Xhelal Sveçla, bëri me dije se ky është sulmi i katërt në pak ditë ndaj Policisë së Kosovës.

LEXONI GJITHASHTU

• Kurti për sulmin në Mitrovicë: Donin të vrisnin policët
• Policia e Kosovës konfirmon sulmin ndaj saj në veri