Problemi i pagave te Vllaznia, Kadia: Marrëveshja nuk ka përfshirë Këshillin Bashkiak, buxheti ende i parishikuar

Futbollistët e Vllaznisë kanë marrë garanci se do të marrin pagat e 4 muajve të fundit dhe pas kësaj zgjidhjeje ata i janë rikthyer stërvitjes. Por situata nuk duket kaq e kthjellët sa duket.

Kryetarja e Këshillit Bashkiak Shkodër, Brisela Kadia, tregoi për Euronews Albania se nuk ishte në dijeni të marrëveshjes së raportuar në media.

Ajo e cilësoi atë të njëanshme mes kryebashkiakes Voltana Ademi e futbollistëve dhe këmbënguli se nuk ka përfshirë Këshillin, i cili ka rol vendimmarrës.

“Ne i kemi kërkuar zj. Ademi që të sjellë për miratim pasqyrat financiare dhe buxhetin e klubit Vllaznia, këto nuk janë sjellë pavarësisht thirrjeve të vazhdueshme, prandaj ditën e sotme thirra mbledhjen e asamblesë së klubit, mbledhje që do të zhvillohet të premten,” – tha Kadia duke u shprehur se thirrjen e mbledhjes e ka bërë në cilësinë e kryetares së Asamblesë.

Edhe mbledhja e thirrur nga Kadia kërkon vënien në dispozicion të këtyre pasqyrave financiare.

Klubi i Futbollit Vllaznia është shoqëri aksionere me kapital shtetëror. Asambleja drejtuese e saj është Këshilli i Bashkisë Shkodër.

Mbledhja e fundit është zhvilluar në muajin nëntor 2019-të, ku pritej të shqyrtoheshin pasqyrat financiare të viteve 2018 dhe 2019-të.

“Pasqyrat e vitit 2018 duhej të ishin miratuar deri në mars ose qershor 2019, periudhë që ka pasur mandat këshilli i kaluar bashkiak, por kjo nuk ka ndodhur, dhe kjo problematikë zvarritet,” – tregoi Kadia e cila theksoi se pasqyrat financiare nuk u miratuan në nëntor për shkak të rekomandimeve të dhëna nga Kontrolli i Lartë i Shtetit, auditi i Bashkisë Shkodër dhe Komisioni i Posaçëm hetimor ngritur nga bashkia.

Mosmiratimi i pasqyrave financiare ka sjellë bllokimin e lëvizjeve ekonomike të klubit Vllaznia, pasi ato kanë penguar regjistrimin e këshillit të ri mbikëqyrës të klubit në Qendrën Kombëtare të Biznesit.

Megjithatë Kryetarja e Këshillit Bashkiak Shkodër këmbënguli se kjo nuk e ka penguar klubin që të hapte diskutimet për buxhetin, diskutime që mund t’i rihapin në mbledhjen e thirrur prej saj të premten, 29 maj.

Por ajo këmbënguli se buxheti i ri duhet bërë sipas rekomandimeve të ekspertëve.

“Kërkesat për rishikimin e buxhetit i janë bërë zj. Ademi dhe administratorit Lici që në muajin mars dhe kemi shprehur gatishmërinë për ta vazhduar zgjidhjen e situatës edhe nën pandemi, por kjo zvarritje ka përshkallëzuar gjendjen,” – u shpreh Kadia e cila zbuloi se prioritet i rishikimit të buxhetit janë pagat.

Prej 30 qershorit të vitit 2019, Bashkia Shkodër ndodhet në ngërç politik. Fituesi i zgjedhjeve vendore, Valdrin Pjetri i Partisë Socialiste, u tërhoq nga marrja e mandatit për shkak të problemeve me deklaratën e dekriminalizimit.

Për shkak se zgjedhjet nuk u ribënë, kryetare e bashkisë ka mbetur Voltana Ademi e Partisë Demokratike. Ajo ka pasur shpesh përplasje politike me Këshillin Bashkiak, që kontrollohet tërësisht nga Partia Socialiste.

Përplasja më e fundit është reflektuar me klubin e Vllaznisë, ku futbollistët nuk kanë marrë pagat prej muajit janar.

Lexoni gjithashtu:

Vllaznia rikthehet në stërvitje, lojtarët dhe drejtuesit arrijnë një marrëveshje për pagat e prapambetura

Këshilli Bashkiak i Shkodrës kërkon rishikimin e pasqyrave financiare të Vllaznisë