Aleanca për Teatrin shkon në Kukës, Robert Budina zbulon planin: Do të ngjallim besimin e të rinjve

Aleanca për Mbrojtjen e Teatrit ka ndaluar sot në qytetin e Kukësit, ndërsa ka mbledhur firmat për rindërtimin e godinës së Teatrit Kombëtar.

Regjisori i njohur, Robert Budina, në fjalën e tij u shpreh se pasi të përfundojë turi për mbledhjen e firmave për peticionin, Aleanca do të organizojë një tubim madhështor në Tiranë.

Ai theksoi se ky tubim gjigand ka për qëllim t’i tregojë kryeministrit Edi Rama dhe Europës, se vendi ynë mund të hyjë në Bashkimin Europian me kulturë dhe me qytetari.

Regjisori thotë se duhen krijuar institucionet e rezistencës, ndërsa protestat i sheh si veprime të domosdoshme.

“Duhet të mbledhim peticionin, që shqiptarët nuk janë vetëm njerëz që mbushin barkun me bukë, por janë njerëz të kulturës. Mbasi të mbledhim firmat, do organizojmë një marshim gjigand në Dëshmorët e Kombit për t’i treguar Ramës dhe Europës që Shqipëria futet në BE me kulturë. Sepse do ngjallë besimin e të rinjve. Kemi 2 vjet e 3 muaj që protestojmë. Demokracia fitohet në shesh. Nuk është politika për të fituar pushtet, por për të fituar të drejtën”, u shpreh Budina.