Shtyhet për herë të shtatë gjyqi ndaj ish-ministrit Tahiri dhe ish-drejtorit të policisë Çela

Gjykata e Posaçme e Apelit për Korrupsionin dhe Krimin e Organizuar shtyhu për herë të shtatë radhazi gjyqin ndaj ish-ministrit Saimir Tahiri dhe ish-drejtorit të policisë Vlorë, Jaeld Çela.

Në seancën e sotme, ish-Ministri nuk ishte prezent, por megjithëse ai përfaqësohej nga avokat i tij Maksim Haxhia gjyqi u shty.

Në dalje nga gjykata, avokati i Çelës, Petrit Ismailaj konfirmoi se gjyqi u shty prej Aktit Normativ të qeverisë për zhvillimet e seancave gjyqësore nën pandeminë e COVID-19, por dhe prej mungesës së Tahirit, i cili, siç tha ai, nuk ishte njoftuar personalisht nga gjykata.

Akti Normativ i qeverisë, miratuar më 25 mars, shtyn seancat vonesat e të cilave në gjykim nuk shkaktojnë dëme të parikuperueshme, nuk kanë afate në mbarim të masave të ndalimit apo paraburgimit.

Me të njëjtën arsye Gjykata ka shtyrë seancën të paktën edhe tre herë të tjera.

Gazetari i Euronews Albania Xhevair Zhabina, e cilësoi të çuditshme shtyrjen e vazhdueshme të seancave, pasi “zakonisht në apel çështjet nuk zgjasin kaq shumë”.

Që prej fundit të vitit 2017-të, ish-ministri Tahiri është akuzuar se në bashkëpunim me Çelën kanë ndihmuar grupin e Habilajve për të trafikuar drogë.

Në vitin 2019 ish-Ministri u dënua me 5 vite burg vetëm për shpërdorim detyre, por ky dënim u kthye në 3 vite e 4 muaj shërbim prove.

Ish-drejtori i policisë Vlorë, Çela, u dënua gjithashtu për shpërdorim detyre 3 vite e 4 muaj, por ndryshe nga Tahiri ai nuk përfitoi konvertim të dënimit me burg, pasi ishte arratisur.

Më 16 maj ai u dorëzua pas pothuajse 3 vitesh arrati, por më 19 maj Gjykata la ndaj tij masën e arrestit me burg.

Lexoni gjithashtu:

Dorëzohet ish-drejtori i policisë Jaeld Çela, u dënua për shpërdorim detyre bashkë me ish-Ministrin Tahiri

Apeli lë në burg ish-drejtorin e policisë së Vlorës, Jaeld Çela, i akuzuar si bashkëpunëtor i Habilajve

Shtyhet sërish gjyqi ndaj ish-ministrit Tahiri dhe ish-drejtorit të policisë Çela