PD denoncon kërkesën e Veliajt për të marrë borxh 30 milionë euro për teatrin e ri

Partia Demokratike denoncoi të enjten kërkesën për të marrë 30 milionë euro borxh për ndërtimin e teatrit të ri, kërkesë që e konsideroi tjetër shkelje të procedurave dhe përpjekje për të vjedhur në një kohë pandemie.

Përmes një postimi në Facebook, ish-deputetja e PD-së, Jorida Tabaku kërkoi që prokuroria të nisë sa më parë hetimet.

Tabaku postoi një faksimile të një shkrese të firmosur nga kryebashkiaku i Tiranës, Veliaj, shkresë e cila mban datën 25 maj dhe i drejtohet qeverisë ku njofton se Banka Evropiane e Investimeve ka shprehur gatishmëri për të financuar “me kushte të favorshme” projektin prej 30 milionë euro të Teatrit të ri Kombëtar.

“Si hajdutë e prishën teatrin në kohë pandemie, si pushtues të lirive përdorën dhunën karshi qytetarëve dhe tani duan të marrin borxhe ndërsa vendi është në krizën e thellë ekonomike,” – u shpreh Tabaku.

“Pa leje, pa rregulla, në shkelje të Kushtetutës, në kundërshtim me çdo normë e parim demokratik, pa fonde me sy e mendje të errësuar si e si për të pasur miliona euro dhe kullat në qendër janë të gatshëm për të vepruar me çdo mënyrë,” – këmbënguli më tej ish-deputetja e PD-së teksa u bëri thirrje prokurorisë që të nisë hetimet.

Lexoni gjithashtu:

Rama përdor fjalët e artistëve për të mbrojtur shembjen e Teatrit Kombëtar