Karakaçi: Centrali elektrik me energji diellore në Karavasta mundësi e jashtëzakonshme për Shqipërinë

Kompania franceze Voltalia u shpall të mërkurën fituese e ankandit për ndërtimin e centralit elektrik me energji diellore në Karavasta.

Drejtor juridik në Ministrinë e Energjitikës, Enea Karakaçi, shpjegoi për Euronews Albania se kjo është një mundësi e jashtëzakonshme për Shqipërinë, e cila përfiton një investim prej mbi 100 milionë eurosh, një mundësi për diversifikimin e sektorit energjitik, por edhe një çmim me ujdi për të siguruar furnizimin e sistemit.

Karakaçi tha se falë bashkëpunimit me Bankën Evropiane për Rindërtim dhe Zhvillim, e cila vuri në dispozicion ekspertë të saj, ankandi u zhvillua me një nivel tejet të kënaqshëm, ku 5 kompani ndërkombëtare paraqitën ofertat e tyre për një central me kapacitet 140 MW.

Eksperti ligjor i Ministrisë tha se kompania Voltalia u përzgjodh fituese pasi paraqiti një ofertë prej 24.89 eurosh për MW, çmim ky i ulët, me të cilin Operatori i Shpërndarjes së Energjisë Elektrike do t’i blejë për 30 vitet e ardhshme 70MW energji.

“Ky çmim është shumë i ulët në krahasim me rajonin dhe po aq shumë i ulët në krahasim me koston me të cilën OSHEE u blen aktualisht energjinë hidrocentraleve, që është diku te 55-60 euro për MW,” – tha Karakaçi i cili u shpreh se tashmë me centralin e Karavastasë dhe çmimin me ujdi të paraqitur ofrohet më shumv siguri për furnizimin e klientëve me energji.

Karakaçi tha se për Ministrinë diversifikimi i sektorit të prodhimit të energjisë mbetet kryesore.

Lexoni gjithashtu:

Mbi 100 milionë euro investim, parku fotovoltaik i Karavastasë do të ndërtohet nga një kompani franceze

Rama rikthen hidrocentralin e Skavicës: Do ta ndërtojmë me forcat tona

Shqipëria do të prodhojë energji diellore