Sipërfaqet e plazhit në Vlorë me mbivendosje pronësie

Pas mbylljes se fazës së parë të aplikimeve për kontratat e stacioneve të plazhimit, disa nga operatorët e turizmit edhe pse janë kualifikuar nga Agjencia kombëtare e Bregdetit, nuk kalojnë dot nĕ fazën e dytë për shkak se parcelat nga bashkia Vlorë rezultojnë të kenë mbivendosje.

Nga zyra e aseteve pranë Bashkisë Vlorë për problematikën e hasur nga disa operatorë, u tha për Euronews se arsyeja e mospajisjes me mandat pagese është se sipërfaqet e plazhit përbëjnë pronë private dhe jo publike dhe në këto kushte nuk mund të cënohet e drejta e pronës.

“Mosgjenerimi i faturës nga ana e Bashkisë Vlorë vjen për të mos gjeneruar konflikte. Arsyeja pse nuk figuron në hartë pronësia është se në formatin GIS qe e kërkon AKSHI nuk mund të bëhen azhornimet e titujve të pronësisë mbi sipërfaqet e plazheve, aty ku ekzistojnë”, deklaroi zyra e aseteve pranë Bashkisë Vlorë.

Sipas Agjencisë Kombëare të Bregdetit, hartat propozohen nga bashkia dhe miratohen nga komitetiteti i menaxhimit te sezonit turistik.

“Nëse nga bashkia në hartë parcela është e lirë nuk mund të ketë mbivendosje. Sa i përket rasteve kur pretendohet pronari kemi kêrkuar dokumentacion i cili nuk na është paraqitur”, u shpreh agjencia.

Ndërsa institucionet kundërshtojnë njëra-tjetrën, për operatorët situata mbetet pa zgjidhje ose duhet të kalojë në proçes gjyqësor.

LEXONI GJITHASHTU

• Kumbaro paralajmëron kontroll të çmimeve abuzive në plazhe
• Plazh në fund të tetorit, turistë të huaj shijojnë detin dhe diellin e ngrohtë të Vlorës