Dita e 9-të e protestës, qytetarët mblidhen para Kryeministrisë

Përfaqësues të shoqërisë civile, aktivistë dhe qytetarë u mblodhën edhe këtë të hënë në sheshin “Skënderbej”, nga ku marshuan në bulevardin “Dëshmorët e Kombit” drejt Kryeministrisë, në ditën e 9-të të protestës për çështjen e zonave të mbrojtura.

Me pankarta në duar ata kërkuan dorëheqjen e kryeministrit Rama duke thirrur njëzëri “Shqipëria është e shqiptarëve”. Protestuesi i bënë thirrje diasporës të bashkohet në Tiranë në këtë protestë e cila tashmë ka marrë jehonë ndërkombëtare.

Pas kanë qëndruar aty, protestuesit kanë vazhduar marshimin e tyre në rrugët e Tiranës.

Ndërkohë një numër qytetarësh janë mbledhur edhe në Shkodër, konkretisht poshtë Kalasë Rozafa duke protestuar për të njëjtën kauzë.

Mjaft forca policie gjithashtu janë prezente, për të siguruar mbarëvajtjen e tubimit.

Edhe Durrësi i rikthehet protestave pas dy ditëve ndërprerje nga zhvillimit i tyre në qytet, teksa është paralajmëruar për rritje të numrit të protestuesve. Me pankarta në duar dhe duke mbajtur fjalime, Durrësi ka mbledhur të moshuar, të rinj e fëmijë.

Për të katërtën ditë radhazi po zhvillohet protesta edhe në Korçë ku qytetarët janë mbledhur tek Katedralja Ngjallja e Krishtit, me flamuj dhe thirrje të vazhueshme.

Qytetarë të Vlorës, po protestojnë në mënyrë paqësore kundër projektit të Zvërnecit. Me emërtime të fshatrave të Vlorës, flamurin Kuq e Zi si simbol kombëtar, qytetarët kërkojnë anulimin e projektit të Zvërnecit. Thirrjet i janë drejtuar qeverisë shqiptare.