Hepatiti akut u merr jetën tre fëmijëve në Indonezi

Tre fëmijë humbën jetën në Indonezi gjatë muajit prill si pasojë e infektimit me hepatit akut. Lajmi u konfirmua nga ministria vendase e Shëndetësisë.

Kjo e çon në 4 numrin e fëmijëve të cilët kanë humbur jetën nga inflamacioni i mëlçisë, pasi autoritetet europiane të shëndetësisë konfirmuan një viktimë javën e kaluar, shkruan Euronews.

Ministria e Shëndetësisë në Indonezi bëri me dije se fëmijët, të cilët u shtruan në një spital në Xhakarta shfaqën simptoma të tilla si ethe, të vjella, verdhëz, diarre dhe humbje të vetëdijes.

Deri më tani janë të paktën 200 raste me hepatit akut në të gjithë botën, sipas Qendrës Europiane për Parandalimin dhe Kontrollin e Sëmundjeve. Mbretëria e Bashkuar është vendi më i prekur, ku deri më tani ka regjistruar 111 raste.

Ekspertët shëndetësorë janë ende duke hetuar për shkaqet e kësaj sëmundjeje.

Hepatiti është inflamacion i mëlçisë, një organ jetik për përpunimin e lëndëve ushqyese, filtrimin e gjakut dhe luftimin e infeksionit.

Inflamacioni mund të ndikojë në funksionin e mëlçisë dhe sëmundja mund të ndryshojë në varësi të shkakut.

LEXONI GJITHASHTU

• Verdhëza është një nga simptomat e hepatitit, thotë drejtoresha e ISHP
• ‘Shenjat e hepatitit të ngjashme me gripin’, mjekja: Kur duhet të kemi kujdes
• Rastet e hepatitit akut tek fëmijët mund të lidhen me adenovirusin
• Evropa në alarm për hepatitin misterioz te fëmijët