Zvogëlohen shanset për maturantët, në raundin e dytë dhe të tretë duhet të aplikojnë për më pak degë studimi

Maturantët dhe kandidatët për studime të larta këtë vit do të kenë më pak mundësi për të përzgjedhur degët e tyre të studimit.

Vitin e kaluar maturantët të cilët nuk dolën fitues në raundin e parë të aplikimit për shkollën e lartë, në raundin e dytë kishin mundësi të përzgjidhnin 10 programe studimi.

Në udhëzuesin e ri të MASR të publikuar në fletoren zyrtare përcaktohet se këtë vit kandidatët do të kenë mundësi të aplikojnë vetëm në 7 degë.

Ndërkaq, për raundin e tretë mundësitë do të jenë edhe më të kufizuara. Nga 10 degë që ishin më parë, këtë vit maturantët do duhet të aplikojnë vetëm në 5 programe studimi.

Nga ky vendim i ri vetëm raundi i parë nuk ka pësuar ndryshime, të gjithë ata që do të aplikojnë për studimet e larta, do të mund të përzgjedhin 10 preferenca.

Të gjithë maturantët kandidatë për studimet e larta do të aplikojnë online në portalin e maturës shtetërore për formularët A1 dhe A1Z.