Thaçi: Kurti, ia heq taksën Serbisë dhe ia vë Shqipërisë

Presidenti i Kosovës, Hashim Thaçi në një reagim të publikuar në profilin e tij në Facebook, i ka cilësuar absurde masat e vendosura nga qeveria “Kurti” në kufi me Shqipërinë.

Sipas asaj që thotë Thaçi ka pasur vonesa procedurale të kontrollit në kufi si dhe shtetasit nga Shqipëria janë futur në karantinë për 7 ditë ndërsa për automjetet është vendosur taksë për dezinfektim.

Presidenti i Kosovës thotë se këto masa ndaj Shqipërisë janë marrë në një kohë kur kufiri me Serbinë është i hapur plotësisht.

“Albin Kurti derisa ka hapur krahë më krah kufirin me Serbinë, për të hyrë kushdo, pa asnjë procedurë si në bahçe të babës, ai nga zyra e uzurpuar sot ka urdhëruar dhe keqpërdorur Policinë e Kosovës. Ai padrejtësisht dhe kundërligjshëm sot ka urdhëruar policinë që të gjithë qytetarët e Shqipërisë që hyjnë në territorin e Kosovës, përpos vonesave procedurale, të dërgohen shtatë ditë në karantinë për të pritur testimin për COVID-19”, shprehet Presidenti i Kosovës.

“Po ashtu, me veprime shtesë, ai ka urdhëruar që automjetet transportuese që hyjnë nga territori i Shqipërisë në emër të dezinfektimit të ngarkohen me taksë të veçantë, duke rënduar edhe më shumë lëvizjen e lirë dhe qarkullimin e mallrave. Ky është absurditet! Hapet me Serbinë dhe e mbyllë Kosovën nga Shqipëria. I heq taksën Serbisë dhe ia vë Shqipërisë. Ky është predikuesi i bashkimit kombëtar! Në fakt, këto veprime janë shqelmat e fundit të Kurtit nga zyra e uzurpuar”, përfundon reagimi i Thaçit.