Nga zgjedhja e presidentit të ri deri tek presioni i VV, 3 sfidat e qeverisë së re në Kosovë

Menjëherë pas publikimit të aktvendimit të plotë të Gjykatës Kushtetuese lidhur me dekretin e Presidentit, për mandatimin e Avdullah Hotit për kryeministër, LDK ka dorëzuar kërkesën për seancë të jashtëzakonshme për të mërkurën, për votimin e Qeverisë së re. Këtë e ka konfirmuar kryetari i grupit parlamentar të LDK-së, Arben Gashi.

Franko Egro, drejtues i emisionit “Balkan Talks” shprehet i mendimit se tashmë LDK nuk e pengon asgjë në formimin e qeverisë së re në Kosovë. Ai tha se, tre shtyllat e programit janë lufta kundër pandemisë, rimëkëmbja ekonomike dhe e treta nisja e negociatave për zgjidhjen përfundimtare të mosmarrëveshjeve me Serbinë.

Nga ana tjetër, gazetari Egro tha se, Lëvizja Vetëvendosje nuk do të qëndrojë duarkryq pasi ata e njohin vendimin e Gjykatës Kushtetuese, por nuk pajtohen me të dhe për këtë arsye kërkesa e tyre do të jetë për zgjedhje të reja.

Albert Krasniqi, drejtor i programeve Demokracia Plus thotë se, Vjosa Osmani sipas të gjitha gjasave mund të vijojë të mbajë pozitën e Kryetares së Kuvendit dhe mund të bëjë opozitën brenda LDK-së, siç edhe ka vepruar më herët për qeverinë e Isa Mustafës, gjatë bashkëpunimit me Thaçin.

“Beteja e vërtetë e partive politike në Kosovë është fitimi i besimit të të rinjve, pasi çdo vit 30 mijë të rinj i shtohen listave të zgjedhjeve”, u shpreh z. Krasniqi.

Lidhur me procedurat e formimit të qeverisë së re, Albert Krasniqi tha se, qeveria “Hoti” duhen të paktën 61 vota për t’u zgjedhur kryeministër. Sipas tij LDK i ka siguruar këto vota, por VV nuk do të heqë dorë nga presioni për të shkuar në zgjedhje të reja.

“Tri sfida, nëse do  t’i bëjë ballë presionit të VV-së për të shkuar në zgjedhje të reja. Pas një viti do të jetë sfida e zgjedhjes së Presidentit, kur në rast se do të dështohet, vendi shkon në zgjedhje të reja. Ndërsa sfida tjetër janë zgjedhje lokale në vitin 2023, por edhe negociatat me Serbinë. E shoh shumë të vështirë që kjo qeveri ta çojë mandatin deri në fund, por do të duhet të testohet”, u shpreh z. Krasniqi.