Përfundon pa marrëveshje takimi i ambasadorëve me anëtarët e Këshillit Politik

Palët politike vijojnë të jenë larg gjetjes së konsensusit për përmbylljen e reformës zgjedhore. Kjo çështja ka qenë pothuajse kryetemë e zhvillimeve politike në vend, ndërsa aktorët ndërkombëtarë kanë bërë thirrje për miratim, si një ndër kushtet e vëna nga BE-ja për t’u anëtarësuar në Bashkimin Europian.

Gjatë paradites së sotme ambasadorët SHBA, BE dhe Mbretërisë së Bashkuar zhvilluan një takim me katër anëtarët e Këshillit Politik, në përpjekje për të afruar palët drejt kompromisit.

Gazetari i Euronews Albania Renaldo Salianji raportoi se ky takim nuk ka prodhuar ndonjë marrëveshje, e cila do mund t’i hapte rrugë miratimit përfundimtar të reformës.

Përfaqësuesi i PD-së në Këshillin Politik Oerd Bylykbashi dhe ai i LSI-së Petrit Vasili pas përfundimit të takimit me ambasadorët zhvilluan një takim edhe me kryedemokratin Basha.

Kryeministri i vendit, Edi Rama, gjatë një bisede me gazetarët paraditen e sotme, shprehu keqardhjen që ende diplomatëve në Shqipëri iu duhet të hyjnë e dalin nëpër seli partish për t’i bindur të arrijnë një marrëveshje, në rastin konkret për reformën zgjedhore.

“Më vjen keq që në 2020 duhet të ketë akoma ambasadorë që hyjnë e dalin në seli partish për të bërë marrëveshje, negociatë, apo diskutim siç është ai mbi rregullat e lojës. Unë mendoj që do të duhet ta kishim bërë vetë këtë”, tha Rama.

Lexoni gjithashtu: 

Rama: I keqardhur që diplomatët hyjnë e dalin ende në seli partish. Nuk fitohen zgjedhjet me ligjin e reformës