Gazetarja e Al Jazeera vritet gjatë bastisjes izraelite në Bregun Perëndimor

Një reportere palestinezo-amerikane e Al Jazeera është vrarë teksa mbulonte një bastisje të forcave izraelite në Bregun Perëndimor, raporton BBC.

Rrjeti me bazë në Katar tha se Shireen Abu Aqla u qëllua qëllimisht dhe me gjakftohtësi nga trupat izraelite në Jenin. Edhe producenti i saj u plagos.

Kryeministri izraelit tha se kishte gjasa që ata të ishin qëlluar nga persona të armatosur palestinezë gjatë një shkëmbimi zjarri.

Por Presidenti palestinez tha se ai e konsideronte qeverinë izraelite plotësisht përgjegjëse për atë që ai e përshkroi si një krim të pastër.

Shireen Abu Aqla, 51 vjeçe, ishte gjerësisht e njohur dhe e admiruar nga shikuesit dhe kolegët.

Të mërkurën herët në mëngjes ajo shkoi në kampin e refugjatëve Jenin për të raportuar mbi një bastisje nga ushtarët izraelitë dhe forcat e sigurisë, për të cilën ushtria izraelite tha se ishte kryer për të kapur “të dyshuarit për terrorizëm”.

Ministria palestineze e shëndetësisë tha se Abu Aqla u godit në kokë nga një plumb i vërtetë gjatë bastisjes. Ajo u dërgua në spital në gjendje kritike dhe më vonë u shpall e vdekur.

Një tjetër gazetar palestinez, producenti i Al Jazeera, Ali Samoudi, u qëllua në shpinë dhe ishte në një gjendje të qëndrueshme në spital, shtoi Ministria e Shëndetësisë.

LEXONI GJITHASHTU:

• Vritet në Ukrainë gazetarja e Radio Evropa e Lirë
• Gazetarja ukrainase tregon pritjen në Kosovë, a po bën Evropa mjaftueshëm