Lufta kundër kanabisit, Sandër Lleshaj: Janë 4 qarqe problematike, legalizimi debat tjetër

Fjalën online para drejtuesve të policisë, ministri i Brendshëm, Sandër Lleshaj, e nisi me ankesat për pushtetin vendor i cili nuk po merr përgjegjësi në luftën kundër kultivimit të kanabisit. Për këtë Lleshaj foli për 4 qarqe problematike.

“Sipas informacioneve që unë disponoj, zonat me rrisk konsiderohen ende disa qarqe të vendit, si qarku i Gjirokastrës, Shkodrës, Durrësit, Vlorës, ku kërkohet përqendrim dhe vëmendje maksimale, pa lënë në vëmendje edhe qarqe të tjera”,  tha ai.

Duke kujtuar vitet e kaluara ku oficerë të lartë të policisë u implikuan në kultivimin dhe trafikimin e kanabisit, Lleshaj kërkoi luftë edhe me të keqen brenda radhëve të uniformave blu ndërsa theksoi se kjo nuk duhet të ngatërrohet me debatin për legalizimin për qëllime mjekësore.

“Legalizim i kanabisit për qëllime mjekësore dhe kultivimi ilegal janë dy çështje që nuk kanë lidhje me njëra-tjetrën”, tha ai.

Një ditë më parë në një raport të agjencisë për monitorimin e drogave dhe EUROPOL, theksohej se parashikohet që këtë vit në Shqipëri do të rritet kultivimi i kanabisit si pasojë edhe e angazhimit të policisë më masat anticovid.