Katër muajt e Albin Kurtit, nga mospajtimet me SHBA tek shkarkimet e bordeve

Saktësisht katër muaj ka zgjatur qëndrimi i Albin Kurtit në zyrën e kryeministrit të Kosovës. Si fitues relativ i zgjedhjeve të 6 Tetorit 2019, Kurtit u përball me negociata të vështira për formimin e qeverisë, me partinë e vetme shqiptare të cilës nuk i kishte vënë vijë të kuqe, Lidhjen Demokratike.

Pas shumë thyerjesh e rikthimesh në procesin e ngadalshëm e bisedimeve, për shkak të ndarjes së pushtetit dhe pozitës së presidentit, Lëvizja Vetëvendosjes e Albin Kurtit arriti marrëveshje me Lidhjen Demokratike vetëm një ditë para votimit të qeverisë.

Më 3 Shkurt, me 66 vota për Albin Kurti u zgjodh kryeministër i Kosovës, duke qenë ndër të rrallë kryeministra që nuk varej nga votat e Listës Serbe, 10 deputetët e së cilës abstenuan.

Nga sfidat e para që Kurti duhej të përballej ishte dialogu bllokuar me Serbinë, që për rifillim, kishte kusht heqjen e taksës 100 për qind, që Qeveria Haradinaj e kishte vënë në Nëntor të vitit 2018.

Zotimin se do ta hiqte taksën, Kurti e kishte bërë qysh para marrjes së detyrës, në takim me të Emisarin Special të Presidentit Trump, për Dialogun Kosovë-Serbi, Richard Grenell, me të cilin, megjithatë, nuk u pajtuan për reciprocitetin.

Përderisa Lidhja Demokratike u pajtua me kërkesën e Grenell që të mos vendoset asnjë masë ndaj Serbisë, Lëvizja Vetëvendosje insistoi në reciprocitet. Pak javë pasi mori detyrën, pa u konsultuar me LDK-në, kryeministri Kurti njoftoi për planin për heqjen e tarifës 100 për qind, dhe vendosjen graduale të masave të reciprocitetit me Serbinë.

Kjo acaroi Lidhjen Demokratike, e cila u shpreh haptas kundër këtij propozimi, duke insistuar në heqje të menjëhershme të tarifës, sipas kërkesës së SHBA-së, si kusht për kthim në dialog me Serbinë. dhe, vendosje të reciprocitetit në koordinim me amerikanët, vetëm nëse Serbia nuk do të ndalte fushatën e çnjohjeve ndaj Kosovës.

Derisa Kurti nuk iu bind kërkesave të SHBA-së, këta të fundit pezulluan disa fonde dhe programe të parapara për Kosovën.

Në planin e brendshëm, që kur mori detyrën, qeveria Kurti duke u thirrur në raportet  e Auditorit bëri shkarkime masive të bordeve të ndërmarrjeve publike.

Përballja me pandeminë COVID19, pati efekt mandat-shkurtues për Qeverinë Kurti.

Ne mes muajit Mars, pak ditë pas konfirmimit të rasteve para me COVID19 në Kosovë, kur numri i përgjithshëm i të infektuarve ishte 19, presidenti Thaçi mblodhi Këshillin Kombëtar të Sigurisë, duke kërkuar shpalljen e Gjendjes së Jashtëzakonshme. Kjo u refuzua nga Kurti, dhe kërkesa e Thaçit mbetet edhe sot në sirtarët e tij, pa u dërguar në Kuvend.

Po atë natë – në orët e vona, atëkohë ministri i Brendshëm, Agim Veliu, në një emision televiziv tha se është për Shpalljen e Gjendjes së Jashtëzakonshme.

Vetëm 12 orë pas, kryeministri Kurti, pa u konsultuar me kreun e LDK-së, Isa Mustafa, njoftoi për shkarkimin e Veliut, me arsyetimin se nxiti panik dhe doli kundër Qeverisë pjesë e së cilës ishte.

Shkarkimi i Veliut shënoi qarjen përfundimtare mes LVV dhe LDK, pasi kjo e fundit vetëm pak ditë më vonë inicioni mocion mosbesimi ndaj Qeverisë pjesë e së cilës ishte – me arsyetimin se “Kurti rrezikoi marrëdhëniet me SHBA-të dhe veproi vazhdimisht njëanshëm duke nëpërkëmbur partnerin qeverisës”.

Me gjithë kundërshtimin e Vjosa Osmanit dhe një grupi të vogël deputetësh të Lidhjes Demokratike – të cilët dolën kundër rrëzimit të Qeverisë, kjo parti dërgoi në Kuvend mocionin, ku më 26 Mars, pas vetëm 51 ditësh nga marrja e detyrës Qeveria Kurti u shkarkua me 82 vota.

Pas shkarkimit Kurti hapi një betejë mediatike me emisarin Grenell, duke e ndërlidhur atë me shkarkimin e Qeverisë së tij, derisa vazhdoi akuzat se presidenti Thaçi ka marrëveshje të fshehtë me homologun e tij serb Aleksandar Vucic, ku përfshihet shkëmbim territoresh.

Ndërkohë, presidenti Hashim Thaçi u aktivizua duke i dërguar pesë letra Albin Kurtit, në kërkim të mandatarit të ri për formimin e Qeverisë së re.

Pas 22 ditësh dhe tri letrash ku Kurti nuk i dha përgjigje të prerë, duke kërkuar zgjedhje të reja, Thaçi i kaloi mandatin Lidhjes Demokratike e cila lidhi koalicion me Aleancën për Ardhmërinë e Kosovës, Nismën Socialdemokrate, Listën Serbe dhe pakicat jo-serbe.

Vetëvendosje dërgoi në Gjykatën Kushtetuese, dekretin e Presidentit Thaçi për mandatimin e Avdullah Hotit, e cila fillimisht e pezulloi atë.

Por më 29 Maj, ajo përfundimisht i dha të drejtë presidentit. Ndërkohë, partia e Albin Kurtit ka organizuar dy test protesta dhe ka paralajmëruar vazhdimin e tyre, deri në zgjedhjet e reja.