Raporti i GRECO: Shqipëria ka plotësuar 40% të masave antikorrupsion

Grupi i shteteve kundër korrupsionit (GRECO), organ vëzhgues i Këshillit të Evropës, publikoi raportin për vitin 2019 në lidhje me nivelin e zbatimit të masave kundër korrupsionit tek deputetët, gjyqtarët, prokurorët dhe zyrtarët e lartë të qeverive të 50 vendeve anëtare.

Në nivel të përgjithshëm, për raundin e katërt të vlerësimit, raporti tregon se 36% të rekomandimeve të Këshillit të Evropës për parandalimin e korrupsionit janë plotësuar tërësisht deri në fundin e vitit të kaluar.

Në raportin e ri autoritetet publike nxiten të jenë shembullore dhe transparente. Rekomandimet me nivelin më të ulët të përputhjes ishin ato në lidhje me deputetët (27%), ndërsa më të lartat në lidhje me gjyqtarët (37%), dhe prokurorët (46%).

Presidenti i GRECO-s Marin Mrcela shprehu shqetësimin e tij për përhapjen e akuzave për korrupsion ndaj zyrtarëve publikë në shumë vende.

“Nuk ka asnjë person, shtet apo institucion me imunitet ndaj korrupsionit. Politikanët, pavarësisht krahut politik, duhet të udhëheqin nëpërmjet shembullit që pritet prej tyre. Politikanët janë për t’i shërbyer, jo për ta sunduar popullin.” u shpreh Mrcela.

Sipas raportit, vendi ynë ka zbatuar plotësisht, deri në fund të vitit 2018, 40% të rekomandimeve, ndërsa 60% janë zbatuar pjesërisht.

Ndërsa masat anti-korrupsion për deputetët dhe prokurorët janë plotësuar me 60 dhe 50 përqind, pjesa e mbetur dhe 100 % e masave për gjyqtarët pjesërisht.

Por në krahasimin me tabelat e vendeve të tjera, Shqipëria në këtë kuadër nuk duket se renditet keq, sipër mesatares së vendeve anëtare dhe më mirë se disa vende të rajonit dhe të BE-së, ku sigurisht shkëlqejnë vetëm vendet nordike me 100% të masave të zbatuara.