Shkon në 34 numri i viktimave nga COVID-19, ndërron jetë 85-vjeçarja

Mbrëmjen e së premtes ka ndërruar jetë në Spitalin Infektiv një paciente 85-vjeçare nga Tirana, e konfirmuar me COVID-19. E moshuara nuk arriti dot të mbijetonte, pavarësisht mjekimit intensiv dhe përpjekjeve të stafit mjekësor, duke çuar në 34  numrin e viktimave të COVID-19 në Shqipëri.

E ndjera, e cila vuante nga insuficiencë kardiake kronike, fibrillacion atrial dhe hipertension, referuar shërbimit infektiv, ndërroi jetë si pasojë e dekompensimit progresiv kardiak dhe pulmonar fatal nga COVID-19.

Gjatë 24 orëve të fundit në vendin tonë janë kryer 162 testime nga të cilat kanë rezultuar pozitivë me COVID-19, 15 persona. Rastet janë identifikuar në Tiranë, 10 raste; Kamëz 2 raste dhe Shkodër 3 raste.

Aktualisht në Spitalin Infektiv aktualisht po trajtohen 23 të prekur, nga të cilët 4 janë në terapi intensive. Më pak se 10% e të prekurve aktivë po trajtohen në spital kurse pjesa tjetër po ndiqen nga mjekët e familjes.

Nga ana tjetër, gjatë 24 orëve të fundit janë shëruar 12 qytetarë, duke e çuar numrin total të tyre që nga fillimi epidemisë në 910. Në vendin tonë janë 269 persona aktivë me COVID-19, ku në Tiranë janë rreth 69 % e të prekurve, kurse pjesa tjetër janë kryesisht në Durrës, Shkodër, Kamëz, Krujë.

Nga fillimi i epidemisë janë kryer mbi 17500 testime molekulare dhe serologjike dhe janë konfirmuar pozitivë 1212 raste, ndërsa rreth 75% e të prekurve janë tashmë të shëruar. Në Laboratorin e Mikrobiologjisë në QSUT janë kryer 2035 testime serologjike në personel shëndetësor, me një pozitivitet të përgjithshëm rreth 7 %”.