Regjistrohen 14 raste të reja me COVID-19, Tirana mbetet vatra më e nxehtë

Ministria e Shëndetësisë ka raportuar të dhënat në lidhje me numrin e personave të prekur nga COVID-19 në vend. Në komunikimin e përditshëm të Task-Forcës, Genta Qirjako nga Instituti i Shëndetit Publik bëri të ditur  se në 24 orët e fundit janë regjistruar 14 raste të reja, ndërsa 13 pacientë të tjerë janë shëruar. 

Rastet e reja me COVID-19 janë regjistruar përkatësisht; 10 raste në Tiranë, 2 në Shkodër,1 në Krujë dhe 1 në qytetin e Durrësit.

“Ju informojmë rreth situatës së COVID 19 në Shqipëri, në 24 orët e fundit.Kanë vijuar testimet në Laboratorin e Virologjisë në ISHP për të dyshuar të prekur me Covid19 dhe vazhdon puna intensive e epidemiologëve në terren për gjurmimin aktiv të rasteve.Në 24 orët e fundit janë kryer 193 testime nga të cilat janë konfirmuar 14 raste pozitive, përkatësisht, 10 raste në Tiranë, 2 raste në Shkodër, 1 në Krujë, 1 në Durrës. Rastet e konfirmuara në 24 orët e fundit janë kontakte familjare te rasteve pozitive dhe disa raste të reja në proces hetimi. Pjesa më e madhe e të prekurve në 24 orët e fundit janë simptomatikë, me shenja klinike të Covid19″,  tha ajo. 

Pavarësisht numrit të të shëruarve, Ministria e Shëndetësisë thekson se ka një tendencë në rritje të shtrimeve në spital. Doktoreshë Qirjako u shpreh se në Spitalin Infektiv po trajtohen aktualisht 30 pacientë, ndërsa 6 prej tyre  ndodhen në terapi intensive. 

“Vijon të ketë shtrime të reja dhe rritje te rasteve në spitalin infektiv, ku aktualisht po trajtohen 30 të prekur, nga të cilët 6 janë në terapi intensive, 2 prej tyre jane të intubuar. Gjatë 24 orëve të fundit janë shëruar 13 qytetarë, duke e çuar në 938 numrin e të shëruarve që nga fillimi epidemisë. Në vendin tonë janë aktualisht 274 persona aktivë me COVID19, rreth 70% e të cilëve janë në Tiranë.Nga fillimi i epidemisë janë kryer mbi 18 mijë testime molekulare dhe serologjike dhe janë konfirmuar pozitivë 1246 raste. Në Laboratorin e Mikrobiologjisë në QSUT janë kryer 2035 testime serologjike në personel shëndetësor, me një pozitivitet të përgjithshëm rreth 7 %.Ministria e Shëndetsisë dhe Mbrojtjes Sociale ju fton për t’u treguar të kujdesshëm për respektimin e distancës fizike me njëri-tjetrin dhe ruajtjen e higjienës vetjake. Nëse keni shenja të sëmundjes telefononi në numrin e Urgjencës Kombëtare 127 dhe në linjën e gjelbër 0800 40 40 për këshillim psikologjik apo çdo informacion për Covid19”, shtoi ajo. 

Statistikat e COVID-19

Testime totale                         18290

Testime molekulare                16255

Testime serologjike                 2035

Raste pozitive                          1246

Raste të shëruara                      938

Raste Aktive                             274

Humbje jete                              34 (Qarku Tiranë 21, Durrës 6, Fier 3, Vlorë 1, Shkodër 2, Kukës 1)

Shpërndarja gjeografike e rasteve

Tiranë          187

Krujë             24

Shkodër        19

Kamëz          14

Durrës           10

Mat                  9

Lushnje           6

Tropojë           2

Korçë             1

Librazhd        1

Mallakastër   1