Të larguarit nga vetingu kërkojnë verifikim të komisionerëve

Cilësia e gjyqtarëve dhe komisionerëve që kryejnë procesin e vetingut në drejtësi vazhdon të mbetet një nga temat më të diskutueshme.

Shoqata “Drejtësi për drejtësinë” ku bëjnë pjesë prokurorë dhe gjyqtarë të shkarkuar, kërkojnë nga Avokati i Popullit verifikimin e procedurës dhe dokumentacionit të zgjedhjes së këtyre personave.

Ish-magjistratët kanë renditur disa prej anëtarëve të shkallës së parë dhe të dytë të vetingut si të zgjedhur në kundërshtim me kriteret ligjore.

Lista kryesohet nga gjyqtarët e Kolegjit të Posaçëm të Apelit. Sipas tyre, përveç Luan Dacit, i cili u pezullua nga detyra me vendim të Gjykatës së Posaçme, por që u rikthye nga apeli disa ditë më vonë, edhe Artan Hajdari nuk plotëson kriteret, pasi mesatarja e studimeve të tij është 6,4 kur ligji e parashikon që duhet të jetë mbi 8.

Në listë sipas shoqatës “Drejtësi për drejtësinë” janë edhe Ina Rama, Albana Shtylla, Sokol Çomo , Rezarta Shutz dhe drejtuesja e KPA, Natasha Mulaj. Ndërsa nga Komisioni i Pavarur i Kualifikimit janë 5 komisionerë që nuk plotësojnë kriteret për t’u zgjedhur në këtë institucion.

Në një intervistë për Euronews Albania, Avokatja e Popullit, Erinda Ballanca tha se ligji për zgjedhjen e këtyre personave kishte kritere përjashtuese. Sipas saj, avokati nuk kishte të drejtë të skualifikonte asnjë kandidat dhe nuk mund të bënte një hetim të thelluar.