Komisioneri Publik kërkon shkarkimin e prokurorit Anton Martini

Komisioneri Publik ka ankimuar konfirmimin në detyrë të prokurorit Anton Martini, i cili mundi të kalonte vettingun.

Sipas Komisionerit Publik, referuar gjendjes së fakteve dhe provave të administruara nga Komisioni i Pavarur i Kualifikimit, vendimi është i cenueshëm në tërësinë e tij dhe për rrjedhojë, subjekti i rivlerësimit nuk arrin nivel të besueshëm për konfirmimin në detyrë.

Anton Martini u konfirmua në detyrë nga shkalla e parë e Vettingut, por Komisioneri Publik e ka ankimuar vendimin në KPA duke gjetur mospërputhje të atyre çfarë deklaron Anton Martini nga ato që i janë gjetur, 3 dosje ku dyshon Komisioneri Publik si dhe disa denoncime.

Prokurori Anton Martini e ka nisur karrierën në sistemin e drejtësisë në vitin 1999 dhe është emëruar prokuror në Prokurorinë e Krimeve të Rënda në vitin 2004.

Në vitin 2015, ai u transferua në qytetin e Shkodër nga Këshilli i Prokurorisë së kohës, vendim  të cilin e kontestoi duke thënë se ishte i paligjshëm. Në qershor 2018, Martini u rikthye në Prokurorinë e Krimeve të Rënda.