Rihapet “shtegu më i frikshëm në botë”, mirëpret vizitorët pas pandemisë

Atraksioni i famshëm turistik spanjoll “Caminito del Rey” shqip “Shtegu i vogël i Mbretit” në Ardales–Alora, është rihapur këtë të premte, pas heqjes së masave të vendosura gjatë pandemisë së COVID-19.

“Është një vend i bukur dhe patëm shansin të riktheheshim për ta vizituar pas mbylljes në shtëpi,” – shprehet Amanda Gomes, vizitore.

Vetëm 550 persona në ditë do të kenë mundësi të vizitojnë këtë pikë kulturore, që zakonisht mirëpret dyfishin e vizitorëve. Vizitat do të jenë të kufizuara përgjatë edhe tre fundjavave në vijim.

Vizitorët do të ndjekin një protokoll sigurie dhe do të ruajnë distancën sociale mes tyre, ndërsa janë marrë masa që ata të pastrohen dhe të dezinfektojnë duart ndërsa përshkojnë shtegun.

I quajtur nga shumë media si “shtegu më i frikshëm në botë”, rruga 3 km e gjatë e “Shtegit të vogël të Mbretit” është ndërtuar mes viteve 1901 dhe 1905, rreth 100 metra mbi grykën e Los Gaitanes.