Rihapet lufta për titull, Tirana bie në Durrës, Kukësi 6 pikë larg

Pas 14 ndeshjesh pa humbje në kampionat, Tirana mundet në Durrës me rezultatin 1-0 nga Teuta. Trajneri Emanuel Egbo provoi për të parën herë shijen e humbjes që nga dita kur mori drejtimin e bardhebluve në një sfidë mjaft interesante. Vendosi goli i Emiljano Vilës, i cili shënoi që në pjesën e parë.

Bardhblutë ruajnë vendin e parë, por tashmë lufta për titull hapet, pasi vetëm 7 javë para fundit diferenca me Kukësin është vetëm 6 pikë. Verilindorët në anën tjetër bëri detyrën në Elbasan Arena, ku ndaj Flamurtarit të rënë nga kategoria nuk hasi aspak vështirësi, në fitoren 4-1.

Skuadra e Orges Shehit e gjeti rrugën e rrjetës shumë shpejt, teksa Abazaj shënoi nga distanca. Më pas, skena ishte për Vasil Shkurtjan, i cili shënoi 3 herë, duke arritur kuotën e 20 golave në kampionat, e tashmë e sheh veten në vendin e parë në listën e shënuesve më të mirë.

Skënderbeu edhe një herë tjetër tregoi se është një kockë e fortë, duke barazuar 1-1 me Laçin. Ku8rbinasit shënuan të parët falë një 11-metërshti që u shndërrua në gol nga Shehu, por Krasniqi vendosi ekuilibrin pak minuta para fundit të ndeshjes. 

Në barazim përfundoi dhe ndeshja tjetër mes Vllaznisë dhe Bylisit. Pavarësisht se skuadra ballshiote e pa veten dy herë në avantazh, vendasit gjetën forcat për të barazuar e për të mos dalë pa pikë nga “Loro Boriçi”.