Protestuesit në Amerikë i vënë flakën një restoranti pas vrasjes së një tjetër personi me ngjyrë nga policia

Protestuesit në Amerikë bllokuan të shtunën një autostradë në Atlanta dhe i vunë flakën një restoranti, ku policët kishin vrarë një person me ngjyrë ndërsa përpiqej t’i shpëtonte arrestit. Ky incident i filmuar në video i nxiti më shumë demonstratat në Amerikë, nisur që prej vrasjes së George Floyd.  

Demonstratat e fundit në Atlanta filluan pak pas mesnatë ndërsa disa pamje ajrore tregojnë të gjithë restorantin të përfshirë nga flakët dhe asnjë zjarrfikës në perimetër.

Sipas hetimeve nga shteti i Atlantës, forcat e policisë ishin njoftuar se i riu po flinte në zonën e restorantit ku porositen ushqime që mund të merren me vete. Më pas forcat e policisë tentuan ta arrestonin, pasi i kryen një test alkoli.

Pamje të filmuara nga një kalimtar tregojnë 27-vjeçarin gjatë një zënke me oficerët, ku me kalimin e kohës Brooks vrapon për tu larguar nga parkingu i restorantit së bashku me një pistoletë elektroshoku të policisë.

Video e dytë nga kamerat e restorantit e shfaqin të riun teksa vrapon, duke i drejtuar policëve pistoletën elektroshok dhe më pas qëllohet nga oficerët.

Avokatët përfaqësues të familjes së tij u thanë gazetarëve se autoritetet e Atlantës nuk kishin të drejtë të qëllonin edhe nëse ai u kishte drejtuar atyre pistoletën elektroshok, një mjet jo vdekjeprurës.

Brooks ishte babai i një vajze të re. Vrasja e tij ndodhi gjatë një periudhe dy javore të protestave mbi vdekjen e një 46-vjeçari me ngjyrë nga policia.

Ndërkaq, autoritetet akoma nuk kanë bërë publikë emrat e dy oficerëve të policisë të përfshirë në vrasjen e 27-vjeçarit.