Kurti publikon vendimet për targa dhe letërnjoftimet

Kryeministri i Kosovës, Albin Kurti ka publikuar vendimet e sotme të Qeverisë për reciprocitet ndaj letërnjoftimeve të lëshuara nga Serbia dhe regjistrimin e automjeteve me targa RKS për automjetet e pajisura me targat “KM”.

Përmes një postimi në rrjetet sociale, Kurti thotë se me këtë vendim është rregulluar kalimi i kufirit shtetëror për qytetarët me dokumente personale të lëshuara nga autoritetet e Serbisë, si dhe veturat me targa të regjistrimit të Serbisë.

Çdo person që paraqitet për kalim të kufirit shtetëror me dokument të identifikimit personal të lëshuar nga autoritetet e Serbisë, në pikë-kalimet kufitare do të pajiset me një fletë-deklarim që përkohësisht e zëvendëson përdorimin e dokumentit të tillë.

Automjetet me targa të regjistrimit të Serbisë që paraqiten për kalim të kufirit shtetëror dhe kanë për qëllim të lëvizin në territorin e Kosovës, duhet të vazhdojnë të kenë të vendosur ngjitësin në pjesën e simboleve dhe emërtimit shtetëror. Ky mekanizëm do të vlejë deri me 31 tetor 2022.

Ndërsa, përmes një vendimi tjetër në mbledhjen e sotme mundësuam regjistrimin e automjeteve me targa RKS për të gjitha automjetet e pajisura me targat “PR”, “KM”, “PZ”, “GL”, “UR”, “PE”, “DA” apo “ĐA” nga 10 qershori 1999 deri më datë 21 prill 2022.

Regjistrimi do të fillojë më 1 gusht 2022 dhe do të zgjasë deri më 31 shtator 2022.

LEXONI GJITHASHTU

• Serbia reagon pas vendimit të Kosovës për reciprocitet të letërnjoftimeve
• Kosova merr vendim për targat, reciprocitet me Serbinë për letërnjoftime