25 vjet nga dorëzimi i Hong-Kongut, presidenti Xi: U ringritëm nga hiri

Presidenti kinez Xi Jinping bëri udhëtimin e parë jashtë Kinës mëmë që nga nisja e pandemisë së COVID-19, duke u ndalur në Hong-Kong, ku tha para turmës se rajoni ishte “ringritur nga hiri” pas vitesh të tëra trazirash.

“Pasi u bashkuan me tokën mëmë, qytetarët e Hong Kongut u bënë padronë të qytetit të tyre dhe e kuptuan se vetëm ata mund ta administronin atë. Nga ky moment filloi dhe demokracia e vërtetë”, u shpreh Xi Jinping, president i Kinës.

Deklaratën e tij, Xi e bëri pas ceremonisë së betimit të John Lee, ish-kreu i shërbimeve të sigurisë që mbikëqyri thyerjen e protestave pro-demokracisë, si shef ekzekutiv i territorit të Hong Kongut.

Ndërkohë, nga Londra, kryeministri Boris Johnson nënvizoi se Britania nuk do ta lërë vetëm ish-koloninë e saj.

“Ne nuk po heqim dorë nga Hong Kongu. 25 vjet më parë ne bëmë një premtim ndaj territorit dhe popullit të tij dhe do ta mbajmë atë. Do bëjmë ç’është e mundur që Kina t’u përmbahet zotimeve të saj, që Hong Kongu të qeveriset nga populli i tij për popullin e tij”, u shpreh Johnson.

Më 1 korrik 1997, territorit iu premtuan 50 vjet vetëqeverisje, liri fjale dhe shtypi, që nuk janë të lejuara në territorin e Kinës mëmë.

LEXONI GJITHASHTU:

• Rusia e Kina shqetëson G7, mbështetje për Ukrainën, kërkohet ndalimi i arit rus
• Kina i ofron mbështetje Rusisë për sovranitetin dhe sigurinë