Serbia në zgjedhje, analistët: “Vuçiç të ndajë mendjen, me Perëndimin apo Lindjen”

Serbia shkon në zgjedhje këtë fundjavë. Publiciteti elektoral shihet thuajse kudo në kryeqytetin Beograd. Presidenti populist Aleksandar Vuçiç, i lidhur ngushtë me Kinën për shkak të pandemisë së koronavirusit, pritet të çimentojë qëndrimin e tij në pushtet. Nga ana tjetër, vendi përballet edhe me përçarjet e opozitës për të bojkotuar ose jo procesin.

“Pyetja është, a do të vazhdojë presidenti me euforinë pro-kineze të nisur në kohën e pandemisë? Apo do të përpiqet të përforcojë marrëdhëniet me Perëndimin? Fakti që presidenti Vuçiç dy ditë pas zgjedhjeve do të udhëtojë në Moskë për t’u takuar me presidentin Putin është një sinjal se Serbia anon nga Lindja”, shprehet analisti politik Bosko Jakshiç.

Dhe pak ditë përpara zgjedhjeve, Serbia u vizitua nga ministri i Jashtëm rus Sergei Lavorv. Gjatë takimit kokë më kokë me të, presidenti Vuçiç u shpreh se Serbia nuk do ta njohë pavarësinë e Kosovës në këmbim të përfitimeve financiare dhe anëtarësimit në BE.