Ministria publikon notat, rreth 22% e maturantëve marrin 10-ta në provim të gjuhës së huaj

Qendra e Shërbimit Arsimor (QSHA) publikoi pasditen e së shtunës rezultatet e provimit të parë të maturës shtetërore, provimit të gjuhës së huaj.

Euronews Albania kontaktoi me drejtoreshën e QSHA-së, Rezana Vrapi, e cila tregoi se rreth 22 për qind (21.98%) e maturantëve kanë marrë vlerësim maksimal: notën 10, ndërkohë që diçka më pak se 4 për qind e gjimnazistëve (4.04%) nuk e kanë kaluar provimin.

Përgjigjet e provimit të gjuhës së huaj mund t’i gjeni duke klikuar këtu.

Rreth 31 mijë maturantë të këtij viti kanë kaluar një sezon jashtëzakonisht të vështirë duke qenë se në muajt shtator dhe nëntor 2019 mësimi u ndërpre për shkak të tërmeteve, ndërkohë që në periudhën mars-maj mësimi u detyrua të ndërpritej sërish, kësaj here për shkak të pandemisë së COVID-19.

Për shkak të infeksionit dhe lehtësisë në korrigjim, Ministria e Arsimit vendosi që provimet të bëheshin vetëm me alternativa dhe fillimisht u vendos që ato të kishin një kohëzgjatje prej 2 orësh, orar që më pas u ndryshua.

Gjuha e huaj ishte provimi i parë i maturës shtetërore, provim i cili u dha më 8 qershor. Nxënësit e gjykuan relativisht të lehtë si provim, por krejt ndryshe ishte ai i Gjuhës Shqipe dhe Letërsisë, i cili u mbajt më 11 qershor.

Me qindra maturantë protestuan ditët më pas me pretendimin se pyetjet ishin jashtë programit dhe koha nuk ishte e mjaftueshme. Protesta që ministrja Besa Shahini i cilësoi të politizuara.

Ministria fillimisht refuzoi kërkesat për rishikim të ndarjes së pikëve, apo të zgjatjes së orarit, por më pas në provimin e Matematikës, që u zhvillua më 15 qershor, ajo riktheu orarin e zakonshëm prej 2 orë e 30 minutash.

Lexoni gjithashtu:

Protesta e maturantëve, Vrapi: Reagimet për shkak të metodologjisë, s’ka më riprodhim

Linda Mëniku: Testi i maturës ishte i keqpërkthyer, duhet të përdoren tekste të autorëve shqiptarë

Shahini për provimet e maturës: Debat i çuditshëm dhe i politizuar