Bisedimet Messi-Barcelona, argjentinasi pritet që të rinovojë dhe për dy vite të tjera

Barcelona ka nisur negociatat për rinovimin e kontratës me Lionel Mesin. Kapiteni i skuadrës është takuar së bashku me babai e tij me presidentin Josep Maria Bartomeu.

Deri më tani është e konfirmuar se sulmuesi do të qëndrojë deri në vitin 2021, por në fund të çdo edicioni 32-vjeçari ka të drejtën të rishikojë mundësinë e largimit. Një vendim i pranuar nga klubi katalanas, që tashmë po diskuton me argjentinasin për të ardhmen.

Siç bëhet e ditur nga mediat spanjolle, palët kanë arritur marrëveshjen paraprakisht për zgjatjen e kontratës dhe për dy vite të tjera, por saktësohet se nuk do të ketë ndryshime sa i përket detajeve financiare, pasi kapiteni ka mirëkuptuar situatën e krijuar nga pandemia.

Klubi e konsideron si diçka thelbësore zgjatjen e bashkëpunimit me Messin, i cili të gjithë karrierën e tij e ka të lidhur me skuadrën katalanase.

Barcelona po ashtu ka në fokus dhe portierin Mark-Andre ter Shtegen. Gjermani kishte nisur bisedimet me klubin për të nënshkruar një kontratë të re, por ndërprerja e aktivitetit për shkak të pandemisë, bëri që gjithçka të ndërpritej e tashmë, palët presin të ulen sërish.

Edhe gardiani konsiderohet si një lojtar shumë i rëndësishëm për skuadrën dhe kërkohet që të mos humben shërbimet e tij.