Ursula von der Leyen mirëpret Hotin, takimi i parë fizik pas pandemisë

Presidentja e Komisionit Europian, Ursula von der Leyen, ka deklaruar sot në rrjete shoqërore se mirëpret vizitën e parë fizike nga një kryetar shteti që nga nisja e pandemisë.

Bëhet fjalë për kryeministrin kosovar, Avdullah Hoti, i cili ka nisur vizitën në Bruksel, e para pasi u zgjodh kryeministër.

“Mirëpresim me kënaqësi kryeministrin e Kosovës këtë mbrëmje, dhe presidentin serb të premten”, thotë presidentja e Komisionit Europian në Twitter.

“Kjo është një mundësi e shkëlqyer për të diskutuar reformat që u nevojiten partnerëve tanë në Ballkan për të ecur edhe më tej në rrugëtimin e tyre drejt BE-së, si dhe për rimëkëmbjen afatgjatë të rajonit”, shkruan Ursula.

Vizita e sotme e kryeministrit Hoti ka përfshirë takime edhe me kreun e Këshillit Europian, Charles Michel, si dhe me kryetarin e Komisionit për Punët e Jashtme të BE-së, David McAllister.

Teksa niste takimet e sotme, Hoti ka deklaruar në Twitter se ka anuluar takimin në Shtëpinë e Bardhë me presidentin Vuçiç, për shkak të ngjarjeve të fundit që kanë ndodhur në Kosovë.

Në takimin e 27 qershorit, në Uashington, ishte planifikuar që të shkonte presidenti Hashim Thaçi e të takohej me homologun serb, Aleksander Vuçiç. Të dy ishin ftuar nga i dërguari i posaçëm i presidentit Trump për dialogun Kosovë-Serbi, Richard Grenell.

Takimi në Uashington do të bëhej për arritjen e një marrëveshjeje të re midis Prishtinës dhe Beogradit, që do të synonte normalizimin e marrëdhënieve. Ftesa u shoqërua nga debate të shumta dhe u pa si anashkalim i BE-së, e cila e ka ndërmjetësuar dialogun deri tani.

Por një akuzë e papritur për krime lufte, e ngritur nga Gjykata Speciale kundër Thaçit, tri ditë para takimit, ka bërë që presidenti i Kosovës, ish-komandant i UÇK-së, ta anulojë takimin në SHBA. Takimi pritej  të vazhdonte këtë herë me kryeministrin Hoti, por edhe ai e anuloi vizitën pikërisht prej këtyre zhvillimeve.

Politikanët shqiptarë të të gjitha partive, në Kosovë e në Shqipëri, e kanë mbështetur njëzëri luftën e drejtë të Ushtrisë Çlirimtare të Kosovës.