Nis në Tiranë festivali ndërkombëtar i filmit Travel Fest Albania

Për herë të parë në Tiranë çelet Festivali ndërkombëtar i filmit Travel Fest Albania. Deri të dielën, në Kinema do të shfaqjen 128 filma nga 42 vende pjesëmarrëse.

Ky festival ka një fokus të veçantë sepse në të marrin pjesë të gjithë prodhimet kinematografike që trajtojnë natyrën, mjedisin dhe turizmin.

Hubert Perr, kreu i bashkëpunimit të delegacionit të BE-së në Shqipëri tregon arsyet pse është i rëndësishëm ky aktivitet.

“Ne e mbështesim këtë aktivitet sepse filmat janë një mënyrë ndërgjegjësimi, përmes këtyre filmave ato trajtojnë disa pikëpamje që janë shumë të rëndësishme si biodiveristeti, ndryshimet klimatike dhe mjedisi dhe vetëm duke parë temperaturat në Tiranë dhe gjithë Evropën është fare e qartë përse duhet të ndërgjesohemi dhe të marrë një veprim në kuadër të ndryshimeve klimatike”, tha ai.

Shumë producentë dhe regjisorë nga vende të ndryshme kanë ardhur në natën e parë të çeljes së festivalit i cili do të mbahet për një javë në Tiranë.

Regjisorja franceze Anastasia Durand në këtë festival konkurron me filmin “Qiell pa Yje”.

“Faleminderit për mikëpritjen. Është hera e dytë që filmi shfaqet dhe jam e lumtur që jam përzgjedhur për të qenë pjesë e këtij festivali”, u shpreh ajo.

Në natën e parë u shfaqen për publikun 6 filma. Festivali Travel Fest Albania do të mbyllet ditën e dielë ku do të ndahen 22 trofe.

LEXONI GJITHASHTU

• “Unë dhe Millosheviçi”, aktori William Baldwin në Kosovë për xhirimet e filmit
• Festivali i filmit të animuar në Francë, mbi 500 prodhime në garë për trofeun