Anglia shpallet kampione e Europës në futboll për femra

Për herë të parë në histori, Anglia u shpall kampione e Europës në futboll për femra. Skuadra angleze vulosi fitoren në minutat e fundit të kohës shtesë.

Uembli plot me 87 mijë tifozë dhe e gjithë Anglia është në festë pas fitores në kampionatin europian të futbollit për femra.

Një finale kjo emocionuese ndaj Gjermanisë, e fituar me rezultatin 2-1 në kohën shtesë.

Statistikat ishin të gjitha kundër britanikeve sepse në dy finale të viteve të shkuara, ata i kishin humbur të dyja, ndërkohë që gjermanet kishin një rekord prej tetë fitoresh në tetë finale.

Pas një pjese të parë ku Gjermania pati rastet më të mira, ndeshja u zhbllokua në minutën 62’ me një gol të britanikes Toone.

Gjermania reagoi menjëherë duke treguar ndoshta superioritetin teknik, dhe gjeti barazimin me Magull në minutën 79’.

U desh koha shtesë për të përcaktuar fitueset, me një gol pas një aksioni disi konfuz në zonën  e rreptësisë, e finalizuar nga Kelly në minutën 110’.

Trofeu i parë femëror në këtë sport për anglezët u dha nga vetë princi William.

Skuadra fituese u përshëndet edhe nga mbretëresha Elisabeth e cila përmes një mesazhi urimi theksoi se kjo fitore është një frymëzim jo vetëm për vajzat dhe gratë, por dhe për brezat e ardhshëm.

LEXONI GJITHASHTU

• Alonso i bashkohet Aston Martin, zëvendëson Vettel