Studentët kërkojnë diplomat, dekani dorëzon listën emërore përfundimtare për depozitim në Rektorat

Dekani i Fakultetit të Ekonomisë, Dhori Kule iu bashkua kërkesës së studentëve për të zgjidhur problemin 1-vjeçar të mosmarrjes së diplomave.

Dhori Kule tha këtë të enjte për mediat se listat me emrat e studentëve për diplomim janë dërguar në Rektorat që në muajin shkurt. Megjithatë, në kërkesë të rektorit të Universitetit të Tiranës studentët dakordësuan me dekanin e fakultetit për dërgimin e listave përfundimtare.

“Për të hequr çdo alibi justifikuese, që më pengon kjo apo ajo, i kam përcjellë listat e studentëve të masterit, janë 1034 me emër, mbiemër, të dhënat pa numër matrikullimi”, tha dekani Kule.

315 studentë të nivelit master nuk janë pajisur ende me kartonin e diplomës si pasojë e mosmarrëveshjeve mes dekanatit të Fakultetit të Ekonomisë dhe Rektorit të Universitetit të Tiranës.

“Ka qenë shumë problematike se shumë studentë donin të iknin jashtë. Kjo ishte një zvarritje e bërë nga universiteti, ministria e quan të ligjshëm të gjithë procesin e diplomave të studentëve, por rektori nuk dëshiron ta quajë të ligjshme”, thotë studenti Eljon Mulgeci.

Më herët Ministria e Arsimit kërkoi në mënyrë të menjëhershme lëshimin e diplomave nga Universiteti i Tiranës.  Nga ana tjetër, rektori i Universitetit të Tiranës, Mynyr Koni përmes një letre publike drejtuar ministrisë, ia la fajin drejtuesve të Fakultetit të Ekonomisë.

Sipas tij, diplomat nuk janë lëshuar për këta studentë pasi atij nuk i ishin përcjellë listat përfundimtare të studentëve të regjistruar për vitin akademik 2017-2019.

Procesi i dorëzimit të listave emërore me të dhënat e regjistrimit për matrikullim në Rektorat, u bë nën praninë edhe të një përfaqësuesi nga Ministria e Arsimit Sportit, kërkesë kjo e vetë studentëve.

Pas plotësimit të kërkesës së Rektorit dhe dorëzimit të emrave për pajisjen me diplomë, studentët shpresojnë në zgjidhjen e problemit.

“Përderisa rektori ka dalë garant që në momentin që do marrë listat do dalë me një qëndrim dhe do fillojë firmosja e diplomave të studentëve, besojmë se do kemi një zgjidhje”, – thotë Xhelo Mile, student.