A do të rinovojë Messi me Barçën? Sulmuesi pezullon bisedimet, mund të largohet në vitin 2021

Të mendosh Lionel Messin pa Barcelonën, ose Barcelonën pa Messin duket mjaft e vështirë, pasi ndër vite ky binom ka treguar së është thjesht perfekt.

Por me sa duket çdo histori e bukur e ka një fund dhe mediat spanjolle raportojnë se fundi është pranë.

Sipas Cadena Ser, Lionel Messi ka pezulluar bisedimet për rinovimin e kontratës me Barcelonën dhe pritet që të largohet në fundin e sezonit të ardhshëm, kur i përfundon edhe marrëveshja aktuale.

Messi kishte një klauzolë në kontratën e tij që i lejonte atij të largohej që këtë sezon por vendosi që të mos e aplikojë.

Nuk janë të paktë zërat që thonë së Messi mund të këtë një ribashkim me Pep Guardiolën. Spanjolli e preferon shumë sulmuesin argjentinas dhe dëshiron me çdo kusht që ta ketë tek Manchester City.

Nuk dihet akoma nëse Messi do të vendosë ose jo të largohet, por Barcelona ka edhe 1 vit kohë për ta bindur gjashtë herë fituesin e Topit të Artë të qëndrojë në ‘Camp Nou’.