Mjeku Koduzi: Qeveria është dorëzuar para situatës, institucione publike janë kthyer në vatra infeksioni

Anëtari i Departamentit të Shëndetësisë në PD, Gazmend Koduzi tha për Euronews Albania se qeveria nuk ka asnjë strategji për të përballuar krizën e shkaktuar nga pandemia e COVID-19 pas daljes së vendit nga karantina, çka ka bërë që institucione publike, duke nisur nga spitalet të kthehen në vatra infeksioni.

“Qeveria nuk ka strategji, e para është parandalimi i përhapjes së virusit, që nis nga parandalimi në institucionet shëndetësore, që lidhet me protokollin e depistimit të personelit shëndetësor dhe çdo pacienti që do të shtrohet në spital, dhe çdo pacienti që del nga spitali. Kemi shumë institucione publike që sot janë kthyer në vatra infeksioni.

Edhe komuniteti duhet të edukohet që është përgjegjës për transmetimin e virusit, gjë që nuk ka ndodhur”, tha mjeku.

Sipas tij, kryeministri e përdori situatën që nga fillimi në shërbim të axhendës së vet politike, duke e mbajtur të mbyllur në një burim të vetëm informacionin për këtë situatë, ndërkohë që në shërbim të institucioneve shtetërore mund të ishin vënë edhe shumë institucione private me infrastrukturë moderne, të afta për ta ofruar më së miri këtë shërbim.

“Nëse do viheshin në dispozicion të shëndetësisë publike edhe institucionet private që mund të ndihmonin në dedektimin e situatës, kjo do të bënte që informacioni të dilte nga qeveria. Me këtë fakt e lidh PD mosmosbërjen e testimeve aq sa duhet.

Aktualisht ne jemi vendi i fundit në rajon për numrin e testimeve”, tha z. Koduzi.

Lexoni gjithashtu: 

Radhët në institucionet shtetërore, asnjë masë për ruajtjen e distancimit fizik nga COVID-19

2 viktima dhe 74 raste të reja me COVID-19 në Shqipëri