Thaçi: Serbia ende s’ka dënuar autorët e krimeve ndaj shqiptarëve

Presidenti i Kosovës, Hashim Thaçi thotë se, Serbia ende nuk ka dënuar përgjegjësit e krimeve ndaj popullatës shqiptare gjatë Luftës së Kosovës. Ai i referohet rastit të vrasjes së tre vëllezërve Bytyqi, të cilët u kthyen nga SHBA për t’iu bashkuar Ushtrisë Çlirimtare të Kosovës, por që pas përfundimit të luftës u ekzekutuan nga forcat serbe.

“Edhe pse u bënë 21 vjet nga vrasja makabre e vëllezërve Bytyqi: Yllit, Agronit dhe Mehmetit, nga strukturat e Serbisë, kryesit e këtyre vrasjeve ende nuk janë ballafaquar me drejtësinë. Serbia jo vetëm që nuk i ka dënuar përgjegjësit e këtij krimi, por ata i ka privilegjuar, duke i vënë në struktura udhëheqëse të shtetit serb. Të gjitha krimet monstruoze mbi popullsinë shqiptare u planifikuan dhe u ekzekutuan nga shteti i Serbisë”, shprehet Thaçi.

Ndaj Presidentit të Kosovës, Prokuroria Speciale ka ngritur aktakuzë për krime lufte, akuza të cilat ende nuk janë konfirmuar nga Gjykata Speciale e Kosovës. Z. Thaçi ka mbajtur qëndrimin se, në rast të zyrtarizmit të aktakuzës, atëherë do të japë dorëheqjen.