Pastronte paratë e grupit kriminal, arrestohet 39-vjeçari nga Korça

Seksioni për Krimin Ekonomik-Financiar në Korçë, nën drejtimin e Prokurorisë së Posaçme kundër Korrupsionit dhe Krimit të Organizuar në Tiranë kanë vënë në pranga shtetasin Dhimitër Shkodrani, 39 vjeç, banues në Korçë, i shpallur në kërkim si pjesë e një grupi të strukturuar kriminal, në fushën e trafikimit të narkotikëve dhe pastrimit të produkteve të veprës penale.

Arrestimi i 39-vjeçarit, i cilësuar si person me rrezikshmëri të lartë shoqërore u bë në sajë të operacionit të koduar ‘Ndihmësi’, pas informacioneve të siguruara në rrugë policore.

Burime zyrtare nga policia e Korçës bëjnë me dije se Gjykata e Shkallës së Parë kundër Korrupsionit dhe Krimit të Organizuar në Tiranë, ka vendosur ndaj tij masën e sigurisë “Arrest në burg” për veprat penale “Pastrimi i produkteve të veprës penale ose veprimtarisë kriminale”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

“Nga veprimet hetimore të kryera, dyshohet se ky shtetas si pjesëtar i një grupi të strukturuar kriminal që operonte në disa vende të huaja dhe në Shqipëri, transportonte në drejtim të vendit tonë, të ardhurat e përfituara nga aktiviteti kriminal i këtij grupi”, bën me dije policia.

Materialet i kaluan Prokurorisë së Posaçme kundër Korrupsionit dhe Krimit të Organizuar Tiranë.