Ekzekutohet me armë zjarri një 39-vjeçar në Elbasan, emër i njohur për Policinë

Një ngjarje e rëndë është shënuar ditën e sotme në Elbasan. Policia e Shtetit bën me dije se një 39-vjeçar është ekzekutuar me armë zjarri në rrethana të paqarta.

“Në Elbasan, në vendin e quajtur  “Rrethrrotullimi i luleve”, në rrethana ende të paqarta është vrarë me armë zjarri shtetasi E. R. 39 vjeç”, njofton policia.

Gazetari i Euronews Albania, Eni Ferhati raporton se viktima është Emiliano Ramazani, i cili është qëlluar për vdekje në mjetin tip “Ford Focus” me targa  AA 945 DG. Sipas informacioneve të administruara nga grupi hetimor, rezulton se 39-vjeçari i vrarë në Elbasan, ishte i skeduar si person me precedent të theksuar kriminal në fushën e narkotikëve.

Euronews Albania mëson se mjeti që po digjet në ullishte në fshatin Vidhas është tip “Volkswagen”, ndërsa targat e tij janë shpallur në kërkim si të vjedhura nga Komisariati i Policisë Nr.2 Tiranë, rreth 10 ditë më parë.

Pas vrasjes së 39-vjeçarit, autorët e krimit dyshohet se janë larguar me shpejtësi në drejtim të aksit rrugor Bradashesh-Paper.  Siç bën të ditur policia, personi/at i kanë vënë zjarrin mjetit dhe janë larguar në kodrat përballë Paperit.

Policia e Elbasanit menjëherë ka ngritur pika kontrolli dhe postblloqe, për të bërë të mundur identifikimin e më pas kapjen e autorëve.

Në ndihmë të Policisë lokale janë nisur FNSH dhe RENEA, si dhe një grup specialistësh të Departamentit të Policisë Kriminale. Grupi hetimor ndodhet në vendin e ngjarjes, ndërkohë vijon dokumentimi i provave që priten të çojnë në zbardhjen e kësaj ngjarjeje të rëndë.