Gastronomët në Kosovë, sipërmarrësit e bareve dhe restoranteve ‘dorëzojnë çelësat’

Me një aksion protestues, të hënën, shoqatat e gastronomëve, bizneseve dhe zejtarëve në Kosovë do të shprehin pakënaqësitë e tyre për mungesën e mbështetjes nga institucionet shtetërore në kohë pandemie.

Këto shoqata kundërshtojnë orarin e kufizuar të punës, ndërsa kërkojnë lehtësira financiare për të ringjallur bizneset e goditura nga masat kundër përhapjes së COVID19.

Ata u kërkuan bizneseve të cilat i përfaqësojnë që më 27 korrik, nga ora 12 deri në orën 13, të mos punojnë, dhe gjatë kësaj kohe t’i bashkohen aksionit, ku simbolikisht qeverisë së Kosovës do t’i dorëzohet një çelës.

Kryetari i shoqatës ESNAF, Varis Xhejlani, tha se institucionet duhet të nxjerrin një manual të ri dhe të lehtësojnë punën e bizneseve, në mënyrë që të mundësohet rimëkëmbja ekonomike.