Dialogu Kosovë-Serbi, Krasniqi: Mungon konsensusi, duhet të përfshihen edhe Shtetet e Bashkuara të Amerikës

Emërimi i Skënder Hysenit si koordinator shtetëror për dialogun vetëm dy ditë takimit në Bruksel dhe mospërkrahja nga partnerët e koalicionit qeverisës, po shihet si dobësim i pozitës së Kosovës në këtë proces.

Jeta Krasniqi, nga Instituti Demokratik i Kosovës, thotë se mbetet shqetësues fakti se Hyseni u emërua vetëm dy ditë para se të zhvillohet takimi, duke vënë në pikëpyetje mundësinë e tij për tu përgatitur për këtë takim.

Krasniqi thotë se edhe në të kaluarën ka pasur procese të cilat kanë filluar në nivel më të lartë politik me kryeministër e presidentë, por pastaj diskutimet kanë derivuar në nivel më teknik nga ekspertët.

Duke qenë se emërimi i koordinatorit u prit me skepticizëm nga partitë politike në vend, përfshi edhe ato pjesë e koalicionit qeverisës, Krasniqi thotë se do të ishte dashur të kishte një dakordim paraprakisht për këtë çështje.

Një marrëveshje përfundimtare siç po propagandohet nga krerët e institucioneve vendore, Krasniqi thotë se ka kuptim vetëm atëherë kur flitet për njohje reciproke. E për arritjen e një marrëveshje të tillë, ajo e sheh të domosdoshëm edhe përfshirjen e Shteteve të Bashkuara të Amerikës.