Përpjekje për vaksinën anti COVID-19, në SHBA nis faza e tretë e testimit, 30.000 vullnetarë të përfshirë

Duke mbajtur maskë në fytyrë, presidenti amerikan Donald Trump ishte vetë i pranishëm në një nga vendet ku është duke u testuar një vaksinë e mundshme anti COVID-19.

Shtetet e Bashkuara të Amerikës po financojnë shuma të konsiderueshme parash pas disa programeve dhe kreu i Shtëpisë së Bardhë shpreson që një rezultat i suksesshëm do të arrihet në fund të vitit.

Faza tretë e testimit klinik të vaksinës sapo ka nisur nga kompania e bioteknologjisë me bazë në Massachusetts Moderna.

Me më shumë se rreth 30.000 vullnetarë të përfshirë, kjo është prova më e madhe studimore e vaksinës anti COVID-19. SHBA ka më shumë se 4.2 milionë raste të konfirmuara me coronavirus dhe shumë nga vullnetarët po merren nga zonat ku janë vatrat më aktive të virusit.

Por edhe në shumë shtete të botës vijon gara për të zbuluar sa më shpejt vaksinën. Në Universitetin e Oxford, dy fazat e para të testimit u zhvilluan njëkohësisht në prill në jug të Anglisë, kur siguria dhe përgjigjet imune u vëzhguan në më shumë se 1 mijë vullnetarë të shëndetshëm të moshës 18 deri në 55 vjeç.

Vaksina tanimë është në fazën e tretë dhe të fundit të testimit edhe në Brazil, sfidë e ndërmarrë nga Universiteti në Sao Paolo.