PS-ja pranon ftesën e opozitës së bashkuar, Këshilli Politik mblidhet sot në orën 18:00

Përfaqësuesi i Partisë Socialiste në Këshillin Politik Damian Gjiknuri i ka kthyer përgjigje opozitës së bashkuar, e cila theksoi se është e gatshme të ulet në tryezë për të diskutuar për ndryshimet kushtetuese.

Teksa shpalos disa propozime që sipas tij kanë për qëllim arritjen e konsensusit, z. Gjiknuri me anë të një email-i ka konfirmuar prezencën në mbledhjen e sotme, e parashikuar të mbahet në orën 18:00.

“Duke marrë në konsideratë shqetësimet tuaja që lidhen me kërkesën për hapje 100% të listave dhe mospengimin e koalicioneve parazgjedhore, mazhoranca në mbledhjen e djeshme të Këshillit Politik ofroi një propozim konsensusi sa vijon:

1. Miratimi i amendimeve kushtetuese të cilat edhe sipas opinionit të ekspertëve të pavarur nuk pengojnë as hapjen 100% të listave të kandidatëve dhe as koalicionet parazgjedhore.

2. Reflektimin më pas të këtyre amendimeve kushtetuese në ligjin elektoral përmes një procesi diskutimi në Këshillin Politik.

3. Përsa i takon shqetësimit të opozitës jashtëparlamentare për çështjen e modaliteteve të krijimit dhe regjistrimit të kandidatëve nga koalicionet parazgjedhore, kjo është një çështje që përcaktohet në Kodin Zgjedhor. Në fazën e ndërhyrjes në Kod, përveç ekspertizës që do të merret nga ODIHR, të shqyrtohen të gjitha opsionet e artikuluara nga opozita jashtëparlamentare gjatë diskutimeve të deritanishme në Këshill, siç janë modeli letonez/ hollandez dhe belg. Gjithashtu, të hulumtohet çdo model i një vendi të OSBE që aplikon sistem proporcional rajonal me lista të hapura si ky që ka Shqipëria”, thuhet në përgjigjen e Damian Gjiknurit.

Në përgjigjen drejtuar opozitës së bashkuar, përfaqësuesi i PS-së rikujton se amendamentet e reja kushtetuese nuk ndalojnë hapjen e listave dhe as koalicionet parazgjedhore. Sipas tij, e gjithë çështja qëndron tek zgjedhja e një modeli që kanë vendet e BE-së, e të cilat aplikojnë sistemin proporcional rajonal me lista të hapura, siç pretendon ta ketë Shqipëria. 

“Ekspertët, në opinionin tanimë të bërë publik konstatuan se amendamentet nuk pengojnë hapjen 100% të listave të kandidatëve ashtu sikurse nuk pengojnë grupimin në koalicione parazgjedhore. Sipas ekspertëve, modalitetet e përcaktimit të nivelit të hapjes së listave nga 2/3 deri në 3/3 dhe modalitetet e grupimit të partive në koalicione parazgjedhore, e regjistrimit të kandidatëve duhen përcaktuar në Kodin Zgjedhor”, thekson Gjiknuri. 

Lexoni gjithashtu: 

Opozita fton socialistët të vijohet dialogu në Këshillin Politik për ndryshimet kushtetuese

”Boronicat e arta”, Balla akuza Bashës dhe Shkëlzen Berishës, kërkon hetime nga SPAK

Rama i qartë me opozitën jashtëparlamentare: Kuvendi në 30 korrik voton hapjen e listave

PD-ja i përgjigjet Ramës: Pro listave të hapura, heqja e koalicioneve hall i tij dhe i krimit

Presidenti Meta apel që të anulohet 30 korriku: PS të heqë dorë nga ndryshimet e njëanshme të kushtetutës