Aida Hajnaj emërohet në krye të Byrosë Kombëtare të Hetimit

Aida Hajnaj është zgjedhur zyrtarisht drejtuese e Byrosë Kombëtare të Hetimit. Këshilli i Lartë i Prokurorisë i mbledhur ditën e sotme emëroi unanimisht drejtuesen e Byrosë Kombëtare të Hetimit znj. Aida Hajnaj.

Pas përzgjedhjes dhe verifikimit nga Komisioni përkatës në Strukturën e Posaçme Anti-korrupsion (SPAK), kjo strukturë, i propozoi Këshillit të Lartë të Prokurorisë emrin e zëvendësdrejtores së përgjithshme e Policisë së Shtetit  e cila u emërua sot nga KLP për të drejtuar një prej institucioneve më të rëndësishme të luftës kundër korrupsionit.

Aida Hajnaj Veizaj ka një eksperiencë të gjatë në polici. Ajo u prezantua nga drejtori i përgjithshëm si zëvendëse e tij më 15 shkurt të vitit 2018.

Hajnaj erdhi në këtë pozicion pas detyrës që mbante si drejtuese e Drejtorisë për kufirin dhe Migracionin e emëruar nga ministri i atëhershëm Fatmir Xhafaj. Në karrierën e saj Aida Hajnaj Veizaj ka ushtruar detyrën e shefes së sektorit për Hetimin e Pastrimit të Parave në Drejtorinë për Hetimin e Krimit Ekonomik e Financiar dhe Drejtore e Përgjithshme e Shërbimit të Çështjeve të Brendshme dhe Ankesave (SHÇBA) në Ministrinë e Brendshme

Aida Hajnaj Veizaj e kaloi vetingun e policisë së shtetit më 21 shkurt të këtij viti ku trupa verifikuese e vlerësoi atë si të përshtatshme për të kryer detyrën, të aftë profesionalisht dhe me pasuri të justifikuar. Veizaj ishte e vetmja grua mes 4 kandidatëve për Byronë Kombetare të Hetimit. Kandidatët e tjerë ishin Artur Beu, Ervin Hodaj dhe Idajet Faskaj.

Byroja Kombëtare e Hetimit është strukturë e specializuar e Policisë Gjyqësore, që heton veprat penale në juridiksionin penal të Prokurorisë së Posaçme. Veprat penale që do të hetohen nga anëtarët e Byrosë nën drejtimin e prokurorëve specialë janë krimi i organizuar dhe korrupsioni në nivelin e lartë.