KESH ble 10 mln euro energji, shiu rriti nivelin e Fierzës 2 metra

Niveli i Fierzës u rrit 2 metra pas shiut të fundjavës, por KESH ka vendosur të ruajë energjinë që do të  prodhohet. Me këtë zgjedhje, korporata ka blerë energji për 5 ditë, me vlerë 10 mln euro

Reshjet e fundjavës rritën me 2 metra nivelin e ujit në Fierzë duke dhënë garanci për rritjen e prodhimit të energjisë elektrike. Në shifra rezerva hidrike u rrit me 43 gigavat.

Me çmimet e sotme të tregut kjo  prurje energjetike kushton rreth 20 mln euro, të cilën vendi ynë mund ta shesë apo ta përdorë për nevojat e brendshme.

KESH, megjithatë ka vendosur ta ruajë këtë sasi dhe paralel ka blerë energji në treg të huaj për datat 21-25 shtator në vlerën e 10 milionë euro.

Për drejtuesit e korporatës, këto janë strategji që i paraprijnë nevojës për të garantuar energji elektrike gjatë dimrit, kur nevoja për konsum do të jetë më e lartë.

Vetëm për shtatorin, KESH ka shpenzuar 44 mln euro në treg të huaj, ndërsa që prej fillimit të vitit, fatura e blerjeve mbërrin në 295 mln euro.

Në çmimet e bursës, një megavat kushton sot 385 euro, ndërsa kërkohet që popullata të kursejë aty ku është e mundur energji.

LEXONI GJITHASHTU:

• Rrumbullaku anulon urdhrin e Gledis Nanos për gradën kryekomisar
• Artistët kundër censurës: Të ndalim mafien në pushtet, jo artin
• Frederik Ndoci: Injoranca po bëhet monument, rinia e paedukuar