Avdullah Hoti shkarkon bordet e 4 ndërmarrjeve publike të emëruara nga Kurti

Qeveria e Republikës së Kosovës, me kërkesë të kryeministrit Avdullah Hoti, ka mbajtur sot mbledhjen korresponduese në të cilën ka marrë vendime nga fushat e përgjegjësive të saj kushtetuese dhe ligjore.

Në mbledhjen e sotme, Qeveria e Kosovës ka firmosur vendimin për shkarkimin e Bordeve të Përkohshme të Drejtorëve të katër Ndërmarrjeve Publike: Ndërmarrjes Publike, Kompania Rajonale e Ujësjellësit KRU “Prishtina” Sh. A.; Ndërmarrjes Publike Qendrore NPH “Ibër – Lepenc” Sh. A.; Ndërmarrjes Publike “Korporata Elektroenergjetike e Kosovës – KEK” Sh. A. dhe Ndërmarrjes Publike KRU “Hidroregjioni Jugor”, Prizren Sh. A.

Po ashtu, qeveria ka emëruar Bordet e Përkohshme të këtyre katër Ndërmarrjeve Publike.

Pavarësisht se rezultoi i infektuar me Covid-19, kryeministri Avdullah Hoti po vijon punën në distancë, ndërsa këtë e tregoi sot me vendimin për të shkarkuar bordet e caktuara nga paraardhësi i tij në qeveri, Albin Kurti.