Paralajmërim për përmbytje në Kosovë, Hoti kërkon të merren masa

Instituti Hidrometeorolgjik i Kosovës thotë se për shkak të reshjeve të shiut, që nisën të mërkurën në mëngjes, në disa zona mund të ketë përmbytje. Reshjet e shiut do të vazhdojnë edhe nesër dhe në ditët në vijim, thuhet në njoftimin e institutit.

“Reshjet të cilat kanë filluar me intensitet më të lartë gjatë orëve të mëngjesit të datës 05/08/2020, do të vazhdojnë edhe gjatë ditës së sotme dhe të nesërme (06/08/2020) si dhe ditëve në vazhdim, me intensitet të ndryshuar, të cilat në disa zona mund të paraqesin mundësi për vërshime”, thuhet në deklaratën për media.

“Nëpër rrjedhat kryesore lumore do të ketë ngritje të lehët të niveleve gjatë ditëve në vijim, ndërsa rrjedhat me karakter malor dhe ato të rrëmbyeshme do të paraqesin mundësi të vërshimeve të shpejta dhe vështirësi nëpër zonat/vendbanimet ku ato kalojnë”, vijon njoftimi i Institutit Hidrometeorologjik të Kosovës.

Kryeministri i Kosovës, Avdullah Hoti, tha se pas paralajmërimeve për vërshime të mundshme, ekipet emergjente kanë rritur shkallën e gatishmërisë për të ndërhyrë në rast nevoje.

“Agjencia për Menaxhimin e Emergjencave së bashku me FSK-në do të jenë në gatishmëri për të intervenuar sipas nevojave që paraqiten nga komunat”, ka shkruar Hoti në rrjetin social Facebook.

Të mërkurën në Kosovë, që në orët e hershme të mëngjesit kanë nisur reshje të vazhdueshme të shiut, të cilat po vazhdojnë ende.