Një viktimë dhe 125 raste të reja me Covid-19 në Shqipëri

Ministria e Shëndetësisë raporton se në 24 orët e fundit në vend janë regjistruar 125 raste të reja me Covid-19, ndërsa një qytetare 55-vjeçare nga Vlora ka humbur jetën.

Rovena Daja nga Instituti i Shëndetit Publik tha se në Spitalin  Infektiv dhe tek “Shefqet Ndroqi” janë të shtruar 122 pacientë, 19 në terapi intensive dhe tre të intubuar. Ndërkohë 37 qytetarë janë shëruar nga sëmundja duke e çuar numrin total në 3379.

Autoritetet shëndetësore që nga fillimi i pandemisë dhe deri sot kanë kryer mbi 46 mijë teste të dyshuara për coronavirus, prej të cilave 6536 kanë rezultuar pozitivë, ndërsa numri i viktimave nga Covid-19  ka shkuar në 200.

 Tirana renditet e para për nga numri i viktimave, ndërsa ndiqet nga Shkodra, Durrësi,  Fieri, Elbasani, Korça, Lezha, Kukësi, Vlora, Dibra dhe në fund Berati.

Shpërndarja gjeografike e rasteve aktive sipas qarqeve:

Tiranë 1627

Durrës 366

Shkodër 254

Fier 120

Vlorë 108

Korçë 100

Lezhë 99

Kukës 95

Elbasan 68

Berat 49

Gjirokastër 36

Dibër 35

Mosha mesatare e rasteve të konfirmuara me Covid-19 është 47 vjeç. Sipas ministrisë së Shëndetësisë, grupmosha 55-64 vjeç zë përqindjen më të lartë të të prekurve me 19.7% të rasteve të konfirmuara e ndjekur nga grupmosha 25-34 vjeç me 18.5% të rasteve të konfirmuara.

Autoritetet kanë ftuar qytetarët të respektojnë rregullat, të ruajnë distancën dhe të shmangin grumbullimet masive. Këto masa sipas tyre  janë të vetmet që ndihmojnë në shkëputjen e zinxhirit të infeksionit, në kushtet kur ende nuk ka një vaksinë kundër sëmundjes.