Gjykata e Elbasanit dërgon për gjykim çështjen ndaj Arbër Paplekajt

Gjykata e Elbasanit ka vendosur që të dërgojë për gjykim çështjen ndaj ish-efektivit të RENEA-s, Arbër Paplekaj, i akuzuar për vrasjen e Pjerin Xhuvanit.

Gazetari i Euronews Albania, Renato Tafani raporton se për Paplekajn është përcaktuar masa e sigurisë “Arrest me burg”.

Në të njëjtin proces kanë qenë edhe dy ish-nëndrejtorët e Policisë së Elbasanit, Nikollaq Palla dhe Albert Nushi, për të cilët është vendosur gjithashtu që çështja të dërgohet për gjykim, ndërsa ndaj tyre është përcaktuar masa e sigurisë “Arrest shtëpie”.

Famlijarët e Xhuvanit, por edhe të përfshirët në këtë proces, kanë kërkuar që të mos paraqitet video e vrasjes, pasi përveçse nga ana ligjore nuk lejohet publikimi i fakteve apo provave rreth ngjarjes, por edhe një marrëveshje e firmosur nga avokatët mbrojtjës e të akuzuarve në, sipas së cilës nuk do bëhej i mundur publikimi i materialeve filmike.

Në lidhje me publikimin e videos, një pjesë e personave që akuzohen dhe janë pjesë e procesit gjyqësor, do të ankimojnë, pasi pretendojnë se ka pasaktësi në materialin filmik, ku sipas tyre ka pasur ndërhyrje për të devijuar procesin gjyqësor.

Ngjarja e rëndë ndodhi në 21 prill të vitit 2021, katër ditë përpara zgjedhjeve të 25 prillit. Paplekaj ishte pjesë e grupit të Partisë Demokratike, që ishte ngritur me qëllim mbrojtjen e votës.

Atë ditë, pas një sherri verbal, u përdorën edhe armë; ku mbeti i vrarë Pjerin Xhuvani dhe u plagosën 4 persona të tjerë.

Paplekaj pranoi krimin dhe u vetëdorëzua në Repartin e Forcave RENEA në Tiranë, duke thënë se qëlloi për vetëmbrojtje pasi u qëllua më parë nga persona që, sipas tij, po blinin vota.

LEXONI GJITHASHTU

• Gjyqi u shty 5 herë, pritet sot vendimi për Arbër Paplekaj
• Shtyhet seanca për Arbër Paplekajn, vendimi pritet të merret të hënën
• Dështon seanca për Arbër Paplekajn, nuk ka kapacitete transporti