Ekonomi | Kryesore

Propozimi për rritjen e taksës së pronës, çmimet referencë zëvendësohen me të tregut

4 Tetor 2022 | 16:22

Ministria e Financave po punon për një ligj të ri që do të ndryshojë vlerën e taksës së banesave. Diskutimet janë në fazën fillestare, por një ide që po qarkullon mund të çojë në dyfishimin e kësaj takse në disa zona.

Sipas këtij varianti, propozohet që ligji të ndryshojë dhe taksa të përllogaritet mbi bazën e çmimit të blerjes së banesës dhe jo të çmimit referencë sipas zonave, siç është aktualisht.

Formula aktuale përllogarit nivelin vjetor të taksës duke marrë për bazë çmimin e referencës së zonës ku ndodhet banesa, shumëzuar me sipërfaqjen e pronës dhe shkallën e taksës. Shkalla është 0.05 për qind e vlerës së pronës.

Propozimi nuk ndryshon këtë nivel, por zëvendëson çmimet e referencës me çmimin e blerjes së pronës.

Çmimet referencë janë përcaktuar për herë të fundit në vitin 2019, ndërsa tregu ka lëvizur dhe vetëm vitin e fundit ka një shtrenjtim me 40 për qind të pronave, sipas të dhënave të Bankës së Shqipërisë.

Si shembull, një apartament me sipërfaqe 100 metër katrorë në zonën e Shkollës së Baletit, apo përreth Ambasadës Amerikane sot paguan 45 euro në vit taksë prone që përllogaritet me çmimin e referencës prej 900 eurosh.

Por, aktualisht çmimet e pronave në këtë zonë janë mbi 2 mijë euro për metër katrorë. Duke e llogaritur me 2 mijë euro dhe me të njëjtën sipërfaqe prej 100 metër katrorë, niveli i taksës shkon nga 45 euro në 100 euro në vit.

LEXONI GJITHASHTU