Skënderbeu mbetet i përjashtuar nga kupat e Evropës, Gjykata Federale e Zvicrës lë në fuqi dënimin e UEFA-s

Gjykata Federale e Zvicrës ka lënë në fuqi vendimin e UEFA-s për përjashtimin e skuadrës së Skënderbeut për 10 sezone nga turnetë ndërkombëtarë, por dhe gjobën prej 1 milion eurosh.

Mbrëmjen e së mërkurës klubi korçar ka bërë të ditur se gjykata federale ka marrë vendimin për të hedhur poshtë ankimimin e skuadrës së Skënderbeut. Një goditje e rëndë për tetë herë kampionët e Shqipërisë që tashmë do të vuajë dënimin e marrë dy vite e gjysmë më parë nga qeveria evropiane e futbollit.

Skënderbeu u dënua në vitin 2018 nën akuzën e fiksimit të rezultateve, duke u bazuar nga lëvizja e koeficienteve, që sipas specialistëve të UEFA-s ishte një tregues i mjaftueshëm për të marrë masën ekstreme. Ky është dënimi më i rëndë në historinë e futbollit shqiptar që një skuadër ka marrë.

Klubi i Skënderbeut ka paralajmëruar përmes postimit në rrjetet sociale se do ta ndjekë çështjen në Gjykatën Evropiane për të Drejtat e Njeriut, duke e konsideruar të padrejtë vendimin e marrë edhe nga gjykata federale zvicerane.